Jounal Etidyan yo (#2) : Legliz ta dwe envesti nan ansèyman

 

Nan legliz alèkile, nou jwenn plis moun k ap preche pase moun k ap anseye. Se yon pwoblèm majè e se youn nan rezon ki koz anpil fo doktrin ap pwopaje pami kretyen yo. An nou wè kòman predikasyon ak ansèyman te ye nan Legliz primitiv la.

Nan epòk sa a, kretyen yo te chita nan ansèyman selon Travay2.42. Se youn nan rezon ki fè legliz la te enpakte kominote yo. Yo te konnen e yo te prè pou aplike prensip evanjelik yo jan Pòl fè nou wè sa nan 2 Timote 3.16 ak 17. Fokis sou disetyèm vèsè a : « Tou sa ki ekri nan Liv la, se nan Lespri Bondye a yo soti. Y ap sèvi pou moutre moun verite a, pou konbat moun ki nan lerè, pou korije moun k ap fè fòt, pou moutre yo ki jan pou yo viv byen devan Bondye. Konsa, yon moun k ap sèvi Bondye, li tou pare, li gen tou sa li bezwen pou l fè tou sa ki byen». Se ansèyman k ap fè w konnen kòman pou sèvi Bondye.

Predikasyon deklare verite a men ansèyman eksplike l. Predikasyon plis pou enkredil e se okazyonèlman legliz ta dwe tande l men pou ansèyman se an pèmanans li dwe fèt paske se li ki bay leson pou legliz la mete an aplikasyon. Depi yon moun fin disip, nou pa dwe kontinye preche li men se anseye li pou li ka konnen kòman pou l suiv Jezikris.

Li enpòtan pou legliz envesti nan anseyan yo. Tankou, li ka finanse etid yo nan lekòl biblik, dispoze mwayen pou yo achte dokiman epi ba yo plis opòtinite nan asanble yo pou fè enstriksyon fidèl yo.

Marcson Théagène 

Etidyan nan Teyoloji nan STELA

Nivo Preparatwa

Ou ka li premye atik la Johnsley Jean ekri nan lyen sa a Èske li obligatwa pou lave pye nan moman Sentsèn nan?   👇👇